गर्मी ग्ल्यामर

-रामनाथ खनाल

उफ् ! कति साह्रो गर्मी, काठमाडौँको कृष्टिनाको अनुहार यति भनिरहँदा गर्मीले असिन पसिन देखिन्थ्यो । काठमाडौँमै जन्मे हुर्केकी रैथाने नेवार समूदायकी क्रिस्टिनालाई शुरुमा पौडी खेल्न आउँदैनथ्यो । अहिले उनलाई गर्मी गर्दा नियमित स्विमिङ पुल जाँदा जाँदै पौडी खेल्न अभ्यस्त भैसकेकी छिन् । कस्टम लगाएर पानीमा हाम फाल्नुको मजा अर्कै हुन्छ । उनी फुरुङ्ग पर्छिन् । प्रत्येक हप्ता गर्मी छल्न उनी आफ्ना सहपाठीहरुसँगै काठमाडौँ फन भ्याली साँगा पुग्छिन् । ग्रुपमा साथीभाईसँग स्विमिङ गर्नु जस्तो आनन्द अरु के मा पाइन्छ र ! उनी सुनाउँछिन् ।

रामेछापबाट काठमाडौँ अध्ययनका लागि आएकी स्वीकृती पनि नियमित जसोे स्विमिङमा जान्छिन् रे । सुरु सुरुमा अड फिल भए पनि उनी अहिले प्रत्येक हप्ता स्विमिङ गर्ने बानी परिसकेको छ उनीलाई । कृष्टिना र स्वीकृती प्रतिनिधि पात्र मात्र हुन् उनीहरु जस्तै थुप्रै युवा युवतीहरु गर्मी छल्न स्विमिङ पुल धाउन थालेका छन् ।

राजधानीका क्लव, पार्टी प्यालेस र फन पार्कहरु यतिवेला गर्मी छल्ने महत्वपूर्ण थलो बन्न थालेका छन् । अझ भनौँ स्विमिङ पुल नभएको पार्क, पार्टी प्यालेसहरु अव सञ्चालनमा आउन कठिन भैसकेको छ ।

काठमाडौँ फन भ्यालीका सञ्चालक दिनेश गिरी भन्छन् हिजो आज स्विमिङ पुल नै युवा युवतीको पहिलो रोजाई पर्न गएको छ । उनका अनुसार त्यहाँ स्विमिङ गर्न आउने मध्ये अधिकांश युवा युवति नै पर्ने गरेका छन् । उनको स्विमिङ पुलमा दैनिक दुई हजारको संख्यामा स्विमिङ गर्न आउँछन् ।

आज भोली त्यस्ता स्विमिङ स्थलहरुमा युवायुवतीको अलावा वयष्कहरु समेत स्विमिङको मज्जा लिन आउन थालेका छन् । युवायुवती तथा बयष्कहरुलाई लक्षीत गरेर स्विमिङ पुल सञ्चालकहरुले विभिन्न प्याकेजहरु पनि सञ्चालनमा ल्याएका छन् । त्यस्तो प्याकेजमा उनीहरुले कपल, फ्यामिली तथा एडल्ट र बालबच्चाहरुका लागि पनि छुट्टा छुट्टै प्याकेज उपलव्ध गराएका छन् ।

गिरीका अनुसार फन पार्कमा आउनेहरु पचहत्तर प्रतिशत राजधानी काठमाठौँकानै छन् । विशेष गरेर स्कूल कलेज पढ्ने युवायुवतीहरु स्विमिङ गर्न आउने उनी बताउँछन् । प्रायः समूहमा आउने गर्दछन् भने कतिपय कपलमा समेत आउने हुनाले उनीहरुलाई लक्षीत गरेर विभिन्न प्याकेज सञ्चालनमा ल्याएको उनी बताउँछन् ।

स्विमिङ सेवा उपलव्ध गराउने त्यस्ता पार्क एवम् प्यालेसहरुले एक पटकको पाँच सय देखि सात सय सम्म लिने गर्दछन् भने परिवारै सहित आउनेलाई पनि विशेष प्याकेज उपलव्ध गराउने गर्दछन् ।