Welcome to My Blog!

देशका धमिराहरु/सेता कमिलाहरु
माटोका लर्का तेर्स्याएर
मेरो देश लुटिरहेछन्
शासनको श्वाद लिइरहेछन्
पालैसँग चुसिरहेछन्
बर्षौँ देखि आज सम्म

हुलका हुल धमिराहरु
सुन्दर घरका
मुल खाँवोहरुमा
माटोको लेपन लाइरहेछन्

शासन सत्ताको
द्वारमा/मझेरीमा/मटानमा
कुर्सीमा/त्यस ओरपर
उनीहरुको ओहोरदोहोर छ
मस्ति छ/रजाइँ चलिरहेछ

बलियो घरमा
धमिराहरुले माटो उठाउन थाल्छन्
त्यो घर नढलेसम्म
उनीहरुले त्यहीँ खान्छन्/गोव्र्याउँछन्
मलमुत्र त्याग्छन्
हुर्कन्छन्/फस्टाउँछन्

जव घरका निदाल/दलिनहरु
माटिएर/मक्किएर
मझेरीमा खस्न थाल्छन्
मुल थामहरु धुलो बन्न थाल्छन्
तव मानिसले पत्तो पाउँछ
कि सिंगै घर धमिराको
गोलामा परिणत भैसक्यो

धमिराले जव घरमा
आफ्नो साम्राज्य/आधिपत्य खडा गर्छ
तव त्यस घरका मानिसहरुको
कुनै उपचारले/विधिले
त्यस घरको विध्वंस टार्न सक्दैन

मलाई विश्वास छ
धमिरा विनासको अर्को रुप हो
यसले काठमा माटो पोतेर
जतिसुकै लर्का तेर्स्याए पनि
सुन्दर आकृतिमा गोला ठड्याएपनि
यसको कुत्सित चाहना
घरलाई भग्नावसेस बनाउनु नै हो
त्यस्तै देश बनाइरहेछन्/बनाउनेछन् ।

©रामनाथ खनाल
जेरपाटी–४, काठमाडौँ ।